L’HOSTELCUR vence 5-3 y pasa a cuartos.

Llugar: Pabellón Mata Xove. Unos 250 espectadores.

HOSTELCUR XIXÓN H.C. (5): Carolina Correa, Sara González (1), Marta González (2), Olga Giménez, María Díez (2)- e.i. – Ainhoa García, Lorena Alonso y Paula Calleja.

ERG Iserlohn (3): Cristina Vegas, Maren Wichardt, Franziska Neubert, Katharina Neubert, Laura La Rocca, – e.i. – Svenja Runje, Britta Schulte, Saskia Pothoefer, Melanie Kirm.

Árbitros: P. Santos y P. Almeida (Portugal). Nun enseñaron tarxetes.

Goles: 1-0, María Díez (11′); 2-0, Sara González (18′); 2-1, Laura Larocca (35′); 3-1, Marta González (37′); 3-2; Maren Wichardt (38′); 4-2, María Díez (39′); 4-3, Franziska Neubert (40′); 5-3, Marta González (42′).

Volvió la Copa d’Europa a Xixón de la mano del HOSTELCUR que recibió na so pista al Iserlohn en partíu de vuelta de los ochavos de final y fízolo cola tranquilidá d’una buena ventaxa algamada nel partíu d’hai quince días (3-8). L’ensamu xermanu, pese a la diferencia de goles a la escontra que trayía, nun vino a Xixón a pasease y dende’l pitíu inicial punxo too de la so parte pa tratar de tornar la eliminatoria. Una defensa ordenada y unes transiciones rápides ponían pilancos a los obxetivos del HOSTELCUR que taba llevando la iniciativa del choque y contaba con ocasiones nidies pa inaugurar el marcador, cosa que nun ocurriría hasta’l minutu once con un tantu de María Díez nuna contra mui bien llevada ente ella y Olga que-y daría finalmente l’asistencia. Más sero sería Sara la encargada de facer medar la cuenta del HOSTELCUR y con 2-0 llegaríase al descansu.

La eliminatoria taba prácticamente resuelta, pero quedaba ganar el partíu y les alemanes nun se dieron por vencíes y recortaron distancies, volviendo’l xuegu un poco llocu y entrando nuna dinámica de goles nuna y otra portería, xuegu que suel ser prestosu pal espectador, pero que nun gusta a los entrenadores. Anotaron poles xixoneses Marta González (2) y otru más María Díez. Con 5-3 llegóse a los minutos finales y Peke tovía tuvo oportunidá de facer medrar la cuenta con un penalti que nun acertaría a tresformar.

Los cuartos de final de la Copa d’Europa esperen al HOSTELCUR.