L’equipu senior masculín acaba la primera vuelta con un trunfu ante Gradohockey

El pasáu fin de selmana disputóse la novena xornada de les lligues autonómiques tanto senior como de categoríes base. L’equipu masculín del HOSTELCUR XIXÓN H.C. tuvo enfrente a Gradohockey y salió airosu del choque depués de vencer a los moscones por 3-0, nun partíu nel que los de Benchi tuvieron más llegada y más ritmu que’l so rival y fueron los que llevaron la iniciativa en tou momentu. Gradohockey esperaba a la contra, pero los locales nun-y dieron munches opciones y asina llegaría’l primeru de los goles de los xixoneses por obra de Marcos Álvarez. Con esti solitariu gol llegaríase al final del primer tiempu.
Na reanudación les coses continuaríen per unos derroteros asemejaos y siempre col HOSTELCUR comandando les estremaes acciones d’ataque y defensa. Asina llegaría un nuevu gol pa los locales que salió del stick de Dani Méndez con un potente trallazu dende fuera del área. Tendría ocasión Dani de facer medrar la cuenta del ensamu local, pero la falta directa acabaría afrellándose nel poste. Tampoco acertaría n’otra directa que acabaría parando’l porteru rival. Tamién los moscones contaríen cola so ocasión por medio d’otra falta directa y nesta ocasión sería’l porteru xixonés Armando’l qu’acabaría cola aspiración de Gradohockey de recortar distancies. Nesta riestra de faltes directes que se dieron nel segundu tiempu a favor d’unu y otru equipu volvería a tener Dani Méndez la opción pa sentenciar el choque y nesta ocasión, depués d’una parada inicial del porteru rival, Dani Méndez sí acertaría al llevar la bola al fondo de la rede. Yera’l 3-0, faltaben menos de trés minutos pal final y el marcador ya nun se movería. Finalizaba asina la primera vuelta de la competición en Primera B y fadríalo col HOSTELCUR XIXÓN H.C. ocupando la cuarta posición.
No tocante a los equipos de la base solamente xugaríen partidos los equipos de categoría Alevín, Benxamín y Prebenxamín, con resultaos favoratibles pa los alevinesa y prebenxaminos que se desficieron con claridá del Centro Asturianu B y derrota del equipu de categoría Benxamín que cayó 5-2 na pista del Naranco.
El cuadru de resultaos del fin de selmana nos partíos nos que participaron los nuestros equipos fue el que vien darréu: