Victoria y gran partíu del HOSTELCUR en Primera B

Esti mediu día disputóse nel Pabellón Mata Xove el primer partíu de la segunda vuelta ente l’HOSTELCUR XIXÓN H.C. y el C.P. Mieres B, un choque que terminó con victoria local por un claru 6-2 que vien a reflexar el dominiu xixonés sobre’l parqué. El primeru de los goles llegaría nel minutu seis por obra de Lucas, mui activu a lo llargo de tol choque, a pase de Marcos. Los mierenses intentábenlo a la contra, pero topábense con un Armando baxo los palos bien seguru a lo llargo de tola matinal y asina nuna contra del HOSTELCUR sería Marcos, a pase de Dani el que subiría un nuevu tantu al marcador. Tovía antes de llegar al descansu con un potente chut Dani pondría’l 3-0, resultáu col que se llegaría al final de los primeros veinticinco minutos.

Na reanudación, los mierenses mostraríense un poco más incisivos tratando de metese otra vuelta nel partíu, pero nuevamente Armando desbarataba tolos intentos negrillos de recortar la ventaxa. Pol contrario, sería nuevamente Dani Méndez el que anotaría un grandísimu gol depués de recibir una bola mui bien lluchada por Lucas y que pondría la bola na escuadra, lloñe del algame del porteru mierense. El 4-0 duraría poco nel marcador yá que malpenes unos pocos segundos depués de sacar de centro, el Mieres conseguía un gol que venía a premiar el so esfuerzu por metese nel partíu, y volvería a tener otra nueva oportunidá en caso de transformar el penalti señaláu pol árbitru nel área xixonesa, pero Armando, una pesadilla pa los negrillos tola matinal, paró’l tiru y esbarató la posibilidá de que los nervios pudieren llegar a facer mella nel ánimu local. Sería Dani el qu’anotaría dos nuevos goles pal Hostelcur, el segundu de falta directa. Tamién de falta directa anotaría el Mieres el so segundu y definitivu gol, dexando’l marcador en 6-2 pa los locales.

El públicu que se dio cita nel pabellón salió satisfechu pol espectáculu que vio sobre la pista.