Aniversariu XIX: Les tires humorístiques de Mortiner
Normalmente, a primeros del mes de mayu tien llugar la celebración del Día de les Lletres Asturianes, aunque esti añu, debido a la situación del estáu d’alarma quedó aplazada. Non obstante, dende la web facemos un homenaxe a la llingua asturiana asoleyando l’artículu selmanal de les bodes de plata n’asturiano.
El diariu La Nueva España, d’Uviéu, tien una llarga trayectoria de respetu y puesta en valor de la creación gráfica, el dibuxu y la historieta y asina la presencia d’artistas asturianos de la talla d’Alfonso Iglesias, Adolfo García, o más recientemente Igor Medio, Ruma Barbero, Ángel de la Calle (Adela C.), Alfonso Zapico y más otros fue una constante a lo llargo de la historia del periódicu.
Un personaxe surdíu de les páxines de La Nueva España, Pinín, del yá citáu Alfonso Iglesias, ta presente nel imaxinariu de la cultura popular d’Asturies de varies xeneraciones y llegaría a servir de sofitu pal diseñu del cartel del Mundial de hockey sobre patinos celebráu n’Uviéu nel añu 1976.
Anguaño, el trabayu d’un caricaturista y humorista gráficu, Mortiner, vien dexando la so güelga nes fueyes del diariu y tocando a fondo l’actualidá d’Asturies y de Xixón nun pudo dexar pasar per alto les noticies de los éxitos del Club de hockey de la ciudá y asina dedicó en bien d’ocasiones los sos trabayos a dar cuenta d’ellos. Fízolo tanto con caricatures de les persones que veníen trabayando pol hockey xixones nes últimes décaes como coles xugadores que llenaron de trofeos les vitrines del C.P. Gijón Solimar, como con tires cómiques que daben cuenta de dalgún acontecimientu importante de la historia del Club. D’estes últimes vamos dar cuenta darréu .
La primera d’eses tires asoleyóla Mortiner como consecuencia del trunfu del BIESCA na Copa d’Europa de 2010, la tercera vez que l’equipu de Xixón algamaba esi troféu y que tuvo como escenariu’l Palaciu de los Deportes de la ciudá. La viñeta representa a la parexa d’aficionaos del Sporting y qu’habitualmente protagonicen les escenes de la so serie Los martes al gol, que contemplen les evoluciones d’una xugadora y fain un comentariu con un xuegu de palabres.
Malpenes un par d’años más sero, el BIESCA conquistaría la so primer Copa de la Reina y la so cuarta Copa d’Europa. Con motivu d’esos dos éxitos, Mortiner tornaría a facer protagonista al hockey rodáu. Na primera de les tires concede-y cuasi tol protagonismu al entrenador del equipo, Fernando Sierra.
L’otru trabayu de 2012, como decimos, corresponde al trunfu del BIESCA na final de la Copa de Europa que tuvo llugar en Sintra (Portugal), na que les xixoneses s’impusieron al Girona pol resultáu de 3-0. Nesta tira contrapónse la proyección europea del BIESCA cola del Sporting qu’apaez compartiendo una tarta, mui mal repartida, con una xugadora de hockey.
Nuevamente’l hockey sobre patinos fue protagonista d’una tira cómica de Mortiner nel añu 2013, cuando l’HOSTELCUR GIJÓN H.C. algamó la so segunda Copa de la Reina. Nesta ocasión el dibuxante vuelve a facer usu de la presencia de los dos aficionaos del Sporting qu’aplauden a una xugadora del HOSTELCUR que porta la Copa conquistada y un xugador del equipu de balonmano de la ciudá que consiguiera na xornada del domingo l’ascensu a la lliga Asobal.
La victoria na Copa de la Reina disputada en Lloret de Mar, correspondiente a la temporada 2015/16, sería un nuevu éxitu que sirvió de sofitu a Mortiner p’asoleyar en La Nueva España una nueva tira col HOSTELUR como protagonista. Nella apaez una xugadora posando delantre de les famoses lletrones del muelle convirtiendo la J de Gijón nun stick de hockey y el puntu nuna pelota. “La copa, de las reinas”:
Otra aportación que salió de les manes de Mortiner diba ser con ocasión d’una decepción y non d’un trunfu como ocurriera nes veces anteriores. El motivu fue la derrota, na prórroga, na Copa de la Reina de 2017 frente al rival habitual del equipu xixonés: el C.P. Voltregà. La tira encabézase con un títulu significativu “En la victoria y en la derrota” y un par d’aficionaos sofitaos na valla que llenda la pista de xuegu comenten la situación y unu d’ellos diz: “Ye igual, yo sigo viéndoles igual de grandes…”
Otra de les aportaciones de Mortiner tuvo llugar depués de que l’equipu se proclamara campeón de la Copa d’Europa en Lisboa en 2018 y nél vemos a unu de los habituales personaxes del dibuxante glayar al alto la lleva “¡¡Campeonas de Europa!!” cola intención de que tol mundu s’enterada del nuevu trunfu del equipu xixonés.
Les dificultaes económiques que sufren los equipos pa cuadrar el presupuestu y salir a competir tamién les fizo protagonistes el dibuxante nuna tira na que una xugadora de hockey del nuestru Club y otra de balonmano mendiguen una ayuda nuna calle de la ciudá colos sos trofeos al llau (aquel añu, 2018, l’HOSTELCUR ganara la Copa d’Europa y la OK Lliga y el Mavi Nuevas Tecnologías La Calzada, la Copa de la Reina de balonmano) baxo’l títulu de “Es triste pedir…”.
La Copa Intercontinental disputada en San Juan que tanta repercusión tuvo nos medios de comunicación asturianos y na que’l TELECABLE algamó la medalla de plata fue otru de los motivos que salieron de los llápices (o del ordenador) de Mortiner. Un stick faciendo les veces d’un mástil del qu’ondea la bandera de Xixón y un orgullosu “Elogio del horizonte” glaya al alto la lleva “Subcampeonas del mundo. Oíste??!!”
Finalmente, la última de les apariciones del Club salida de les manes de Mortiner ye la referida a la conquista de la cuarta Copa de la Reina de 2019, nella apaez una xugadora sentada nun tronu qu’asonsaña al de la serie “Juego de tronos” y nel que apaecen los personaxes de la mesma comentando con envidia l’apropiación que l’equipu se fai del mesmu.
