Aniversariu XXXVII: Primeros pasos del hockey rodáu en Xixón

Nesti añu nel que celebramos el nuestru 25 aniversariu creemos que ye un buen momentu pa facer un repasu de cuálos fueron los primeros pasos del hockey rodáu na nuestra ciudá.

Xixón fue la primera ciudá d’Asturies na que se tien constancia de la celebración de partíos de hockey sobre patinos. Los pioneros d’esta actividá utilizaron les pistes de la Feria de Muestres y les del Continental pa xugar los primeros encuentros d’esta modalidá deportiva nel Principáu. Too ello nun sería posible ensin una lista de nomes propios que contribuyeron al nacimientu del hockey en Xixón: Enrique Gabiñáu Molas, Agustín Antuña, Atorrasagasti, Emilio Pla, Antonio Madruga, los hermanos Menéndez (Luis, Armando y Carlos, conocidos como Los Cubanos), etc.

L’afición xixonesa pol patinaxe entamaría nos primeros años del sieglu XX yá qu’en 1906 tenemos noticies de la costitución del centru deportivu Tennis and Skating Club del que llevaron les riendes los señores Piquero y Castrillón. L’actividá d’esta sociedá nun queda especialmente reflexada nes cróniques de prensa yá que na mayoría de los casos faise referencia a les actividaes del mui aristocráticu Skating Ovetense. Años más sero, gracies a la pista que ponía a disposición de los patinadores el Parque Continental, los xixoneses volveríen a tener un llugar nel que patinar, yá que nel mes d’agostu de 1947 convertía la so pista de baile en pista de patinaxe, convocando concursos d’habilidá y de velocidá al estilu de los skating rink que proliferaron nos años finales del sieglu XIX y los primeros del XX. D’ente los participantes en categoría masculina atopamos a Scott al que meses más tarde veremos convertíu en xugador de hockey sobre patinos baxo la disciplina del Grupo Cultura Covadonga.

No tocante al nacimientu del Club Patín ye un poco abegoso precisar una fecha con exactitud. Paez ser que yá nel añu 1947 s’entamaben a xugar partíos de hockey na ciudá y el 4 d’abril de 1948 nacía oficialmente’l primer club de Xixón, el Club Patín que xugaba los sos partíos na pista del Parque Continental. Raúl Álvarez, unu de los fundadores comenta nuna entrevista asoleyada nel diariu El Comercio, que’l Club naciera en setiembre de 1947, y relata asina’l nacimientu:

“Fuimos un grupo de “chalaos” que patinábamos en la pista del Continental. En los primeros tiempos estábamos “empufados” fuertemente, y gracias a la ayuda del dueños del Continental (mi padre), pudimos ir “tirando”, hasta la época actual en que nos sostenemos, así, así, con las aportaciones de los socios –unos ochenta- y simpatizantes, y con el fuerte apoyo de nuestro Presidente, Don Dionisio F. Nestral”.

Por otra parte, otru de los pioneros del hockey xixionés, varios años depués nuna “Carta abierta a todo aficionado”, Juan Atorrasagasti y otros cinco exxugadores y técnicos señalen que la idea de crear un club de hockey nació nel veranu de 1947, presentado la documentación pa la so aprobación ante les autoridaes el 15 d’avientu d’esi mesmu añu y consiguiendo la so aprobación el 4 de mayo de 1948.

Bien pocu tiempu depués un nuevu equipu de hockey surdía na ciudá cola constitución de la correspondiente sección nel Grupo Cultura Covadonga, el 23 d’abril de 1948. Esta sociedá polideportiva llegó a traer un entrenador madrileñu, Reyes, cola intención de subir el nivel del hockey. Tamién hai noticies qu’adelanten la creación del primer club xixónés al añu 1947.

El primer partíu ente los dos equipos pioneros en Xixón tuvo llugar el día 5 d’avientu de 1948. La victoria correspondió al Patín por 7-0 y les primeres aliniaciones del hockey xixonés fueron les que vienen darréu:

Club Patín (7): Cea I, Raúl, Pla (1), Junquera (1) y Cea II (5)

Grupo Cultura Covadonga (0): Enguita, Scott, Carlos Menéndez, Luis Menéndez y Cifuentes.

Nestos primeros pasos del hockey en Xixón, arriendes d’estos partíos ente’l Grupo y el Patín (nunu d’esos enfrentamientos que tuvo llugar el 23 de xineru de 1949 y que ganaría’l Patín por 4-3, yá apaez como árbitru Gabiñáu, una figura imprescindible dientro la historia del hockey xixonés), tamién seríen habituales partíos contra equipos d’Uviéu, como’l que tuvo llugar contra’l Juventud Distrito Universitario d’Uviéu que ganaron los xixones con autoridá: 6-1. Nel equipu carbayón yá xugaba Covisa, un nome de gran importancia nos entamos del hockey na capital d’Asturies.

Nuevos nomes van asomándose a esti deporte a través de les primeres cróniques de prensa, sumándose, d’esta manera, al proyectu d’introducir el hockey sobre patinos en Xixón: Pepe, Armando, …

El Patín xugaría la final del Campeonatu d’Asturies de 1949 na pista del Colexu Auseva d’Uviéu, el día 27 de febreru, imponiéndose al equipu carbayón por un contundente 0-7, con cinco goles de Pepe, conquistando’l derechu de ser el club que representaría a Asturies nel Campeonatu d’España de la categoría que se disputaría en Burgos.

D’esta manera’l Club Patín convertiríase nel referente xixonés d’esta modalidá deportiva, nacíu del entusiasmu de xente como l’industrial Alfonso González (patinador na so mocedá), que sería’l sociu númberu uno; Antonio Álvarez; Raúl Álvarez; o Dionisio Fernández Nespral, que sería’l Presidente. Contaba nel añu 1949 con doce xugadores, ente los que destacaben Tino (porteru), Raúl (defensa), Junquera (mediu), Pepe (delanteru) y Emilio  Pla (delanteru). Collaboraben tamién nel día a día del club Pepe y Tino Antuña, asina como Gabiñau que se convertiría nos años siguientes nun verdaderu encontu del nuestru deporte.